يعني إيه سرطان؟ وإزاي أحمي نفسي منه؟

بقالي كام سنة بشوف إعلانات مستشفى 57357 في التلفزيون والسنة دي انضمت ليها إعلانات مستشفى بهية و500500، الإعلانات دي رسخت جوايا مجموعة مفاهيم عن مرض السرطان، من ضمنها إنه مرض قاتل وإنه ممكن يجي لأي حد وإنه بيدمر عائلات بحالها. وتكونت عندي صورة لشكل الشخص الذي يعاني من هذا المرض، دايما بدون شعر ووزنه خفيف..

ولكن مع كل الإعلانات دي ومع إن في ناس كتير قريبين مني جالهم المرض ده وفي بعضهم منجاش منه، إلا إني اكتشفت قريب جدا إني ماعرفش حاجة خالص عن مرض السرطان. كل فكرتي عنه إنه مرض وحش، وبس.. تخيلوا كان إيه ممكن يكون رد فعلي لما اتحطيت في موقف اتقالي فيه إني معرضه لإن يكون عندي سرطان في يوم من الأيام، أو إن حد قريب مني ممكن يجيله المرض ده.. كان رد فعلي ببساطة إني اتخضيت، ولكن مفهمتش برضه يعني إيه سرطان؟

ما هو السرطان؟

بقالي سنة بذاكر كتير قوي مرض السرطان بأنواعه، وبالرغم من إني لا أحمل أي خلفية طبية إلا إني اكتشفت إن في حاجات كتيرة قوي الواحد لازم يكون عارفها حتى من غير ما يكون طبيب. طبعا مش كل حاجة عن السرطان ممكن تجتمع في موضوع واحد باستفاضة لأن في أكتر من 100 نوع من المرض ده، وبسبب التنوع الكبير ده، هركز على المعلومات الأساسية والنصيحة الأولى عندي هي إن أي حد لازم يتحمل مسئولية توعية نفسه عن المرض ده ويعرف أنواع السرطان المعرض لها، ويأخذ كل الإجراءات الوقائية ضده.

إجابة سؤال ما هو السرطان؟ تتلخص في بعض السطور القليلة، السرطان هو النمو غير الطبيعي للخلايا، في خلايا جديدة بتتولد في جسم الانسان دائما، والسبب في ده ممكن يكون عشان الجسم لسه بينمو أو الخلايا الميتة أو التالفة بيتم استبدالها، السرطان هو إن الخلايا دي تنمو بشكل غير طبيعي أو في مناطق ليس من المفترض أن تنمو فيها، وطبعا على اختلاف أنواع وأشكال وأماكن الخلايا تختلف أنواع وأشكال السرطانات والأورام السرطانية.

ما هو سبب السرطان؟

نقدر نقول إن مفيش سبب محدد للسرطان، أو السبب وراه لا زال تحت الدراسة، ولكن في دراسات توصلت لبعض العوامل اللي ممكن ترفع نسبة تكوين السرطان عند أشخاص معينيين، سواء بسبب العرق أو السن أو النوع أو الموقع.

سمعت من ناس كتير الجملة دي: "إنتي مش عارفة إن المايكروويف بيجيب سرطان!؟" إيه هو مدى صحة العبارة دي؟ العبارة دي صح ولكنها غلط في الوقت نفسه. ببساطة لأن معظم الأبحاث عن السرطان كانت أبحاث إحصائية، مثال على كده في دراسات كتيرة جدا اتعملت عن علاقة بودرة التلك بسرطان المبايض، وفي كتير منها بيثبت إن استعمال بودرة التلك بيرفع خطر التعرض لسرطان المبايض بنسبة 40%. ولكن عرض نتيجة الدراسة بالشكل ده ممكن جدا يتفهم غلط، لازم نفهم الدراسة اتعملت ازاي عشان نفهم إذا ده كان ليه تأثير علينا، واحدة من الدراسات دي على سبيل المثال، تمت في مستشفى في واشنطن، وتم استفتاء المريضات بمجموعة من الأسئلة، من ضمنها أسئلة حول تاريخهم المرضي ونوع شغلهم وتعرضهم للمخدرات والأدوية، وواحد من الأسئلة دي كان إذا كانوا بيستخدموا التلك. وبحساب نسب إحصائية وصلت الدراسة لأن نسبة معينة من المريضات استخدموا التلك وبالتالي الدراسة بترجح إنه كان سبب في رفع خطر تكوين الأورام السرطانية في المبايض، ولكن مش ضروري يكون هو السبب الوحيد أو انه يكون سبب أصلا. والأهم من ده وده إنه سبب في رفع نسبة الخطر مش سبب في وجود السرطان، بمعنى إن السيدات دول معرضين لسرطان المبايض بتلك أو من غيره، بس ممكن يكون التلك ساهم في ظهور المرض أو بمعنى آخر ساهم في تكوين الورم داخل المبيض. الدراسة دي كمان اتعملت في مكان معين، في حي معين بين سيدات بيتشاركو في حاجات كتيرة ممكن تكون السبب زي مياه الشرب أو نوع التربة اللي بتنمو فيها الخضروات في المنطقة دي أو نوع معين من الفيروسات. في دراسات كتيرة برضه عن الفيروسات المسببة لرفع نسبة خطر التعرض للسرطان. في النهاية أهم شيء قبل تصديق أي حاجة تتقال قدامنا عن أي سبب للسرطان إننا نعرف هل إحنا عندنا الجين أصلا؟ هل إحنا معرضين؟ وهل الحاجة دي فعلا بترفع نسبة الخطر؟ ولا دعاية وبروباجنده وخلاص؟

لازم كمان نتعرف كويس جدا على المنتجات اللي بنتعامل معاها كل يوم، بمعنى إن في بنات كتيره جدا من بعد دراسة التلك دي ما ظهرت بطلوا يستعملوه، ولكن في ناس كتيره ماتعرفش إن بودرة ظلال العيون ومستحضرات التجميل وبودرة الوجه معظمها فيها تلك ولازالوا بيستعملوها.. قراءة ملصق المكونات على أي منتج سواء غذائي أو غيره من أهم الطرق اللي نقدر نوعي بيها أنفسنا ونعرف إيه بالضبط داخل أجسامنا.

مين معرض للسرطان؟

معنى كده إن في ناس ممكن متسخدمش حاجة معينة ولكن يجيلها سرطان برضه؟

أكيد. الحاجة الوحيدة الأكيدة اللي توصلها العلم في الوقت الحالي هو إن في جينات معينة معرضة لأنواع معينة من السرطانات وفي أعمار معينة. بمعنى، إن نسبة تكوين خلايا سرطانية في جسم الانسان مرتبط بالجين ده، على سبيل المثال الموقع ده بيقول في جينات اسمها BRCA1 وBRCA2 دي العلم تعرف عليها على إن ليها قابلية لسرطان الثدي ودي موجودة في حوالي واحدة من كل 200 أنثى في العالم، ولكن مش معنى إن عندي الجين يبقى أكيد هيجيلي المرض، بس الاحتمالية بتزيد. وبشكل عام سرطان الثدي بيكون احتماليته أكبر فوق سن الخمسين، لكن مش معنى كده برضه إن مش ممكن ييجي في العشرينات.

أعرف منين؟ وأحمي نفسي إزاي؟

محدش يقدر يعرف لو فعلا هيجيله سرطان ولا لأ ولكن ممكن نعرف لو إحنا معرضين ليه أو فيه احتمالية إنه يجيلنا، ولازم نتعرف على أنواع السرطانات واحتمالياتها بالنسبة لأجسامنا عن طريق استشارة المواقع الطبية الموثوق فيها أو استشارة الأطباء الموثوق فيهم برضه. ولازم نكوم عارفين إيه أكثر أنواع السرطان إلى جسم كل واحد فينا معرض ليها تحديدا، على سبيل المثال، سرطان الثدي ممكن يجي للرجال، ولكن في حالات نادرة، يبقى مش من الطبيعي إن الراجل يفكر يحمي نفسه منه وياخذ إجراءات وقائية. أول خطوة هي دائما المعرفة، لأن معرفتنا السليمة بأجسامنا هتخلينا دائما عارفين نعمل إيه عشان نحميها. الخطوة الثانية هي أخذ إجراءات وقائية والكشف الدوري الدائم، عن طريق استشارة طبيب والتعرف على التاريخ العائلي للسرطان.

مراحل السرطان

السرطان زي ما قلنا هو عبارة عن نمو غير طبيعي في الخلايا ممكن ينتج عنه أورام مثلا. معظم أنواع السرطان ليها كذا مرحلة في النمو وبشكل عام يمكن علاجها أفضل والشفاء النهائي منها في المراحل الأولى أكثر من المراحل النهائية. لكن في مرحلة في ناس كتير مبتتكلمش عنها وهي مرحلة ما قبل السرطان أو Pre-Cancer والمرحلة دي اكتشافها هو أكثر حاجة كويسة ممكن تحصل، لأن باكتشاف خلايا معرضة للنمو السرطاني ده معناه فرصة أكبر لمنع المرض من الحدوث أصلا ولاكتشاف الأورام المبكر لو حصلت فعلا والتخلص منها مما يعني فرصة شفاء أكبر.

هو في حد بيخِف من السرطان؟

أكيد. كتير. أهم خطوة في طريق علاج السرطان هي خطوة الكشف. الكشف المبكر عن السرطان يعني احتمالية أكبر للشفاء. مراحل تطور مرض السرطان والأورام السرطانية عامة بتتنوع بتنوع المرض نفسه، في كتير منها سهل الكشف عنه من ضمنه على سبيل المثال سرطان الثدي سرطانات الجلد، وفي كتير الكشف عنه أصعب، زي سرطان العظام أو سرطان القولون، وهي أنواع ممكن تتطور وتوصل لمراحل أخيرة قبل ما يتم اكتشافها. وفي الوقت ده بيكون صعب التغلب عليها. عشان كده زي ما قلت قبل كده أول خطوة هي المعرفة، وعدم الاستخفاف بالألم أو الورم وتركه حتى يتفاقم، إلى جانب الكشف الدوري ومعرفة مدى احتمالية نمو أنواع السرطان في أجسامنا. وبشكل عام فالحياة الصحية هي أكبر عامل وقائي ضد الأمراض بشكل عام، الأكل النظيف والنشاط الجسدي والراحة النفسية.

علاج السرطان بيتم حسب المرحلة، المرحلة الأولى ممكن يتم علاجها بالإشعاع الكيمائي Chemotherapy، أو لو المرض في شكل ورم سرطاني بيكون باستئصاله وتحليله وطبقا للتحليل الطبيب بيحدد إذا كان لازم يكون في إشعاع على سبيل الوقاية. وأخيرا في أنواع من السرطان لا يمكن علاجها لما بتكون في مراحلها الأخيرة وبتكون مقاومة للإشعاع.