إيه هي تكيسات المبايض PCOS؟ وإزاي أعرف لو عندي؟

برعاية: مركز ماجده لصحة المرأة – مدينة الشيخ زايد  - د. ماجدة حلمي

إيه هي تكيسات المبايض PCOS؟ وإزاي أعرف لو عندي؟

طول عمري كنت بنت عريضة، من وأنا صغيرة.. ولكن مبدأتش أكون بدينة غير في ثانوي.. السبب ممكن يكون إني زي معظم المصريين بطلت ألعب رياضة في سبيل المذاكرة (مع إني ما كنتش بذاكر)، ولجأت للأكل الكتير جدا وسندوتشات العيش الفينو مع أنواع مختلفة من الجبن واللحوم الباردة والمربى ومفيش مانع من شوية فطير والشاي بسكر زيادة طول الوقت وخصوصا بليل. وطبعا ده أدى لإني في ثانوي (16 سنة) أصبح وزني يساوي وزن واحدة عندها 32 سنة وحامل. وده مش تشبيه أنا فعلا كان وزني هو نفس قريبتي اللي عندها 32 سنة في الوقت ده وكانت حامل.

رمضان من السنة دي صمته ولأول مرة في حياتي 30 يوم كاملين، وبدأ يظهر لي حبوب شباب وشعر في مناطق غريبة. ودي كانت أول مرة أتشخص بتكيس المبايض.. ودي كانت بداية الرحلة... رحلة طويلة جدا لا زالت مستمرة من معارك مع الأعراض (والأمراض) والوزن الزائد.

إيه هو تكيس المبايض PCOS؟

في ناس كتير بتفتكر إنه مرض، ولكنه مش مرض، تكيس المبايض هو متلازمة. اسمه باللغة الإنجليزية Polycystic Ovary Syndrome واختصاره والاسم المعروف به أكتر هو PCOS. يعني متلازمة؟ متلازمة يعني تزامن لمجموعة من الأعراض مع بعض في وقت واحد. مش لازم تكون كلها موجودة ولكن وجود بعض منها أو أغلبها بيدل على وجود المتلازمة. بس مش معنى إنها مش مرض إنها ملهاش علاج، ولكن علاجها مبيكونش علاج للمتلازمة ولكن علاج لأعراضها. وزي ما الاسم بيقول تكيس المبايض معناه وجود أكياس حوالين المبايض بتأثر عليها وعلى وظائف الرحم وبتتسبب الأكياس دي في لخبطة هرمونات الجسم، كما إنها بتتسبب في لخبطة الدورة الشهرية والدورة الدموية بشكل عام، وأخيرا بتلخبط التمثيل الغذائي، وكل ده بيترتب عليه مجموعة أعراض كبيرة جدا.

إيه هي أعراض تكيس المبايض؟

أعراض المتلازمة دي بتبدأ باضطراب في الدورة الشهرية زي إنها تغيب تماما أو تنقطع لفترات غير متساوية أو يحصل معاها نزيف شديد، وزيادة الوزن وصعوبة التخلص منه خاصة في منطقة البطن والظهر والوسط، وزيادة الشعر في أماكن غير معتادة بالجسم وبالرغم من كده تساقط الشعر من الرأس، وحب الشباب واضطراب الدورة الدموية إلى جانب ارتفاع مقاومة الانسولين وارتفاع الكوليسترول في الدم، وبينتج عن كده في أوقات كثيرة عدم القدرة على الإنجاب وداء السكري، وطبعا أكيد بعد كل اللي قلناه ده أكيد لازم نضيف الاكتئاب من ضمن الأعراض.

كيف يتم تشخيص تكيس المبايض؟

المتلازمة مش لازم تحصل أعراضها كلها مع بعض، وعشان كده أول وأسهل طريقة لتشخيص المتلازمة هو زيارة طبيب النساء والتوليد، اللي بدوره هيقوم بعمل فحص بالسونار لرؤية التكيس وحجمه. لو عندك الأعراض كلها، يجب استشارة طبيب موثوق فيه ولا يمكن التأكد من تشخيص المتلازمة سوى عن طريق إجراء سونار وتحاليل دم للتأكد من مستوى الهرمونات والانسولين. السونار كمان بيساعد الطبيب في استبعاد أمراض أخرى.

كيف يتم علاجه؟

منقدرش نقول إن فيه علاج للمتلازمة ولكن في علاج للأعراض المتفرقة كل واحد لوحده. أفضل طريقة للعلاج هو في البداية زيارة طبيب النساء والتوليد ومن المتعارف عليه إنه بيوصف نوع دواء معين هو (ميتفورمين) وهو الدواء الوحيد الآمن المعروف لعلاج أعراض التكيس ولكن الطبيب فقط هو من يستطيع تحديد الجرعة أو الحاجة ليه من البداية، ولكن في أطباء بيقرروا معالجتها بحبوب منع الحمل والهرمونات وهي طريقة فعالة ولكن في حوليها جدل واسع. وفي الوقت ذاته استشارة طبيب تغذية لوصف أنواع من المأكولات تساعد الجسم في امتصاص أفضل للأنسولين وتكون مناسبة للدواء. ويمكن استشارة طبيب جلدية لعلاج حبوب الشباب ومن الطبيعي أنه يسأل على بعض تحاليل الهرمونات ووظائف الكبد والكلى قبل وصف الدواء وبعض أدوية الجلدية ليست مناسبة للحوامل والمقبلين على الحمل. بالسبة للشعر الزائد فالطرق التقليدية في الإزالة معروفة وفي بعض الأوقات بيختفي الشعر بنهاية التكيس ولكن في بعض أوقات ممكن يكون في احتياج لأساليب الإزالة سواء التقليدية المتكررة زي الحلاقة والحلاوة والشمع والفتلة، وفي أوقات أخرى ممكن تلجأ بعض البنت لليزر ولكن يجب أيضا استشارة طبيب الجلدية أولا.

هل أنا معرضة لظهور المتلازمة؟

عادة تبدأ اعراض المتلازمة في الظهور في سن صغيرة، في سنين المراهقة بشكل كبير، وقد تبدأ في التفاقم في أعوام العشرينيات. كل الفتيات معرضات للمتلازمة فالدراسات أثبتت أن نسبته قد تصل في بعض الأماكن إلى 60% من التعداد، وده رقم ضخم. المتلازمة معروفة جدا في الشرق الأوسط وهناك أطباء تغذية متخصصين في علاجها ولكن أهم شيء هو التزام الفتاة نفسها بالأكل الصحي والرياضة ونمط الحياة المريح الخالي من الضغط العصبي والنفسي إلى جانب الدواء طبقا لرؤية الطبيب.

ماذا يحدث إذا لم يتم علاجها؟

تفاقم الأعراض قد يؤدي إلى مشاكل كثيرة جدا جدا، أولها وأقربها اتصالا بالمتلازمة هي عدم القدرة على الانجاب، ثاني مشكلة قد تتسبب فيها المتلازمة إذا لم يتم علاجها هي ارتفاع مقاومة الانسولين في الجسم مما قد يؤدي في وقت لاحق لظهور داء السكري وبشكل عام يجعل الجسم في حالة جوع متواصل ورغبة ملحة في تناول النشويات والسكريات دائما لتعويض نقص الانسولين، وفي بعض الدراسات التي ربطت بين تكيس المبايض وبين سرطان المبايض ولكن ده في الغالب بيتطور في عمر أكبر. تطور آخر بالطبع هو زيادة الوزن جدا وده بيترتب عليه ألم المفاصل والعامود الفقري، واضطراب ضغط الدم والنبض غير المنتظم، إلى جانب اضطراب الهرمونات وما يسببه من تغيير لشكل الجسم وكمية الشعر والرغبة الجنسية.

إيه أثر ده على حياتي؟

عدم علاج المتلازمة من شأنه إنه يجعل الحياة أكثر ظلاما، فمع عدم تقبل شكل الجسم و(حجم اللاظليظ) وعدم القدرة على التخلص بسهولة من الوزن الزائد تبدأ الثقة في النفس في الانحدار ويترتب عليها بعض الاضطرابات في العلاقات الاجتماعية. ومع ارتفاع مقاومة الانسولين يبدأ الجسم في إرسال إشارات الجوع الدائم للمخ وعدم الشبع وخاصة الرغبة في النشويات والحلويات، وده بيزود الوزن أكثر وبيهد الثقة في النفس تماما وبيعزز الإحساس بالفشل لعدم القدرة على الالتزام بأنظمة غذائية صحية. والأثر الثاني هو أثر مادي لما يحدثه ذلك من خلل في الميزانية التي ذهب جزء كبير منها للأكل. يتبع كل ذلك حالة من الاكتئاب الشديد وقد تؤدي إلى انهيار الكثير من العلاقات الشخصية والاجتماعية وله أثر طبعا كبير على العلاقات العاطفية. في حالة المتزوجات يضاف إلى كل ذلك الضغط النفسي الناتج عن عدم القدرة على الانجاب.

هل كل الفتيات بيجلهم كل الأعراض؟

لأ. عادي جدا ممكن واحدة تكون رفيعة وعندها تكيس ولكن هيكون عندها خلل في مكان آخر، أو ممكن واحدة يجيلها تكيس وميجيلهاش حب شباب. لأن أجسامنا مختلفة عن بعض واستجابتنا لمستوى الهرمونات في الجسم مختلفة. الفيصل الوحيد في وجود المتلازمة من عدمه هو رأي الطبيب. والشيء الوحيد المشترك بين كل الفتيات هو اضطراب الدورة الشهرية.

دي بعض النصائح المبنية على خبرة شخصية مع المتلازمة:

1.      ماتخديش نصيحة عامة وتطبيقها على نفسك، جسمك مختلف عن باقي الأجسام ومش معنى إن فيه دايت بينفع مع بنت غيرك إنه هينفعلك أو ينفع تعمليه مع الأدوية. لازم تسمعي كلام طبيب موثوق فيه.

2.      الأدوية من غير طبيب أسوأ حاجة ممكن تعمليها بشكل عام، وفي الحالة دي بشكل خاص، خاصة أدوية حرق الدهون والهرمونات وحتى الفيتامينات، لازم استشارة الطبيب.

3.      لو بتعاني مع زيادة الوزن لازم تعرفي إن خسارته هتكون صعبة، أصعب من الطبيعي، يعني لو عملتي دايت مع واحدة صاحبتك في نفس الوقت، هي هتخس أكتر وأسرع ولازم تكوني فاهمة إن العيب مش إنك لخبطي يوم أو أكلتي تفاحة زيادة، على العكس ممكن تكوني ماشية كويس جدا ولكن مع المتلازمة دي لازم قوة إرادة عالية جدا.

4.      الأكل بشكل عام بيلعب دور كبير جدا في استجابة الجسم للدواء واستجابتك شخصيا لعلاج الأعراض، قلة الأكل ممكن تؤدي لنتيجة سلبية وسلبية جدا كمان، أهم شيء المحافظة على كمية مناسبة من الأكل المناسب والمياه، الامتناع عن الأكل أو عن نوع معين من المأكولات أو الأنظمة الغذائية الكيميائية كلها بتشكل خطورة كبيرة على استجابة الجسم على المدى الطويل لعلاج أعراض المتلازمة.

5.      الصراع مع صورتك الشخصية لن ينتهي لو بدأ، الأفضل تتخطيه بسرعة. مش مهم شكل جسمك دلوقتي لأنه مع الوقت هيكون أفضل وهتوصلي للشكل المناسب وعلى بال ما ده يحصل لازم تتعلمي تشوفي نفسك جميلة لأن الجمال هو جمال النفس والروح والشخصية ليس جمال الشكل. احتفظي بمظهرك وادرسي كويس إيه بيليق عليكي وإيه مبيلقش وحافظي على أناقتك دائما وهتحسي مع الوقت بفارق كبير على الأقل نفسيا.

6.      حاولي تحافظي على علاقاتك الشخصية والاجتماعية ومتخليش تقلبات المزاج تأثر على علاقتك بمن حولك، حافظي على أصدقائك الأقوياء والمخلصين وابتعدي عن الناس السلبية بقدر الإمكان.

7.      دوري على هواية. هواية تخليكي سعيدة وتشغل دماغك عن التفكير في السلبيات، حاجة لما تعمليها تنبسطي وتكون مخرج للطاقة السلبية.

8.      أسوأ حاجة تعمليها هي النظر للحواليكي، لأنه يفتح باب للحقد والنفسنة. كل واحد عنده مشاكله وكل واحدة حواليكي حتى لو مكانش عندها نفس تغيرات الشكل الموجودة عندك فهي عندها معركة مع شكلها أو نفسها أو عيلتها أو حياتها العاطفية أو العملية المهم إنك تبصي على نص الكباية المليان وتدوري على الإيجابيات في حياتك وتحمدي ربك عليها لحد متخلصي معركتك.