طريقة تنظيف فرش المكياج

إعتراف: المرة الأولى ليا أستعمل فيها مكياج كنت بستعمل صوابعي أو سفنجة. بس أنا عارفة إن أنا مش لوحدي، كتير جدا بنات مكنوش يعرفوا أهمية فرشة المكياج وإزاي استعمالها الصحيح وقدر الفرق في جودة المنظر النهائي. إذا كنتي بدأتي بالفعل تستعملي فرش لمكياجك لازم تعرفي الطريقة الصحيحة لتنظيف الفرش، ومش الفرش بس، الأسفنج زي مثلا Beauty Blender لازم كمان تحافظى على نظافتهم. طبعا يستحسن دائما تعقيم الفرش بعد تنظيفها، ولكن الخطوة دي أساسية لو الفرش دي استعمالها مشترك، يعني لو بتعملي مكياج لأكتر من حد أو بتستعملي فرشة مش بتاعتك في الأصل.

طبعا أنواع الفرش وطريقة استخدامها ده مش موضوعنا، بس قبل ما تحاولى تنظفي أي فرشاة عندك لازم تعرفي إذا كانت شعرها طبيعي أو صناعي. الفرش اللي شعرها طبيعي هي الفرش المعمولة من أنواع شعر طبيعية ودي شعرها بيجي من فرو الحيوانات في الغالب، أما الفرش الصناعية شعرها بيكون مصنوع من البوليستر أو النايلون. وغالبا فرش الشعر الطبيعي بتستعمل لمنتجات البودرة لأنها مش بتمتص زي منتجات الكريم أو السائل، وعلى العكس لأن البوليستر لا يمتص السوائل فالأفضل استعمال فرش الشعر الصناعي مع المنتجات السائلة أو الكريم. كمان الفرش الطبيعية من مميزاتها إنها مرنة أكتر ومعنى كده إنها بتوزع المكياج أفضل، الصناعية أفضل في الأماكن اللي محتاجة دقة في الرسم.

إزاي تعرفي إذا كانت الفرشة من شعر طبيعي أو صناعي:

ممكن إنك تفرقي بالنظر، الفرش الطبيعية غير لامعة، أما البوليستر سهل معرفته لأنه بيلمع زي البلاستيك. غالبا الفرش الطبيعية بتكون أغلى، وفي شركات مبتعملش فرش طبيعية من الأصل بهدف حماية الحيوانات زي مثلا: Real Techniques وThe Body Shop ولكن ده مش معناه أبدا إن فرشهم أقل جودة بالعكس كتير منهم ممكن يشبه جدا للفرش الطبيعية.

التنظيف:

أول حاجة هو اختيار المادة المنظفة، في 3 أنواع من منظفات الفرش، النوع الأول هو المنظفات السائلة، وده بيكون عبارة عن سائل مصنوع خصيصا لتنظيف الفرش، غالبا بيكون سعره غالي وصعب الحصول عليه في مصر. النوع الثاني والأكثر شيوعا هو Beauty Blender Solid وهي صابونة معمولة في الأصل لتنظيف الـBeauty Blender لكن في الحقيقة ممكن استعمالها مع أي فرش للمكياج كمان. لو الصابونة سعرها غالي أو صعب الحصول عليها ممكن استعمال النوع الثالث وهو الصابون العادي، بالنظر على مكونات Beauty Blender Solid هتلاقي إن المكونات الموجودة فيها مشابهة لمكونات صابون الوجه العادي، الفرق الوحيد هو إن فيها زيت الصبار والهدف منه إنه يكون أنعم على الفرشة، من السهل إنك تلاقي صابونة فيها بعض المرطبات ودي فيها نسبة ترطيب هتحافظ على نعومة الفرشة وخصوصا الفرش الطبيعية، بالنسبة للفرش الصناعية فأي نوع صابون ولو حتى شامبو هينظفها لأنها في النهاية مشتقة من البلاستيك.

الخطوة التانية هي طريقة التنظيف نفسها، وهنا يبان المعدن الأصلي للفرشة، صناعة الفرشة الكويسة بتبان من تماسك الشعرات في اليد، إذا غسلتي الفرشة ونتج عنها تساقط ده معناه إن صناعتها معتمدة فقط على اللزق وإن عدد الشعرات قليل. الخطوة الأولى في عملية الغسيل هي وضع الفرشة تحت المياه الجارية بعد كده هتمشيها على الصابونة بشكل دائري بنفس شكل استعمالها مع المكياج لضمان إن الصابون يوصل لكل المناطق اللي بيوصلها المكياج أثناء الاستعمال. بعد كده لازم نطلع المكياج من الشعر، وده عن طرق تدليك الفرشة على كف اليد، ممكن استعمال أداة للتنظيف ودي بتكون مصنوعة من السليكون وشبه البيضة ودي بتكون أسهل كتير في التنظيف -ودي اللي أنا بحب استعملها شخصيا- أو استعمال "مات" وهي عبارة عن قطعة من السليكون بتتحط في الحوض وممكن استعمالها لتنضيف الفرش.

الخطوة النهائية هي التنشيف، لازم تتأكدي إن الفرش محطوطة بشكل أفقى على فوطة نظيفة ودائما عيدي تشكيل الشعر في الاتجاه الصحيح قبل ما تسيبي الفرش تنشف. لو حابة تعقمي فرشك استعملي سباري كحل ورشي طبقة خفيفة جدا على طرف الفرشة فقط بعد ما تنشف تماما.