ازاي تعرفي صلاحية المكياج

مش عارفة أنا لوحدى ولا فى بنات كتير زيي بس أنا بحب جدا إنى اتفرج على المكياج، سواء على اليوتيوب أو على فيسبوك، ساعات كتيرة بدخل على المواقع والصفحات واتفرج على المنتجات الجديدة واتأملها بحب.. ممكن ده يكون شيء غريب بس هي دي الحقيقة وأنا فخورة بيها :D

لفترة طويلة قبل اهتمامي بالمكياج كان عندي كام حاجة بستعملهم كل فترة وخلاص.. لكن مؤخرا مجموعتي بدأت تكبر وطبعا لأن أنا كائن استهلاكي جدا (دي حاجة وحشة جدا محدش يبقى زيي لو سمحتوا) كان في حاجات كتيرة مبستعملهاش طول الوقت، أو يمكن مبستعملهاش خالص. وفي الحقيقة مكانش بيخطر على بالي أبدا إن المكياج ممكن تنتهي صلاحيته وأنا معرفش خصوصا إن مفيش تاريخ صلاحية على على معظم العبوات... الفكرة مخطرتش على تفكيري البسيط والمحدود لحد ما طلعت كريم أساس قديم من المجموعة واكتشفت إنه أصبح لونه أغمق كتير جدا من اللون الأصلي.. ساعتها بس فكرت أدور على تاريخ الصلاحية..

الفكرة إن تاريخ الصلاحية على المكياج مش واضح فى معظم الوقت ولو مكنتيش تعرفي تاريخ شراء المنتج هيكون صعب تعرفي إذا كان صالح للاستخدام أو لأ. لكن في بعض الطرق البسيطة اللي تعرفي بيها.

أول حاجة فى رسم على كل عبوات المكياج بيوضح الفترة المقترحة للاستخدام، الرسمة عبارة عن عبوة غطائها مفتوح ومدون عليها رقم، وده معناه إن المنتج صالح للاستخدام خلال عدد الشهور ده، مثلا لو الرسمة مكتوب عليها 12 يستحسن عدم استخدام المنتج بعد 12 شهر من تاريخ الشراء، عشان كده يستحسن تسجلي تاريخ الشراء لو الذاكرة مش هتسعفك.

وبشكل عام المنتجات السائلة زي كريم الأساس والمكياج السائل صلاحيتها أقل من منتجات الكريم ومنتجات الكريم زي كريم أحمر الخدود وأقلام الحواجب والشفاه وأحمر الشفاه وأقلام الكحل، وأخيرا الأطول عمرا بين منتجات المكياج هي المصنوعة من البودرة زي بودرة الوجه وظلال العيون مثلا.

وبخلاف تاريخ الشراء وتاريخ الصلاحية فى عوامل بتساعد المكياج على الفساد أسرع زي التعرض للهواء لفترة طويلة وخاصة فى حالة الكريمات والسوائل وكمان استخدام أصابع اليد مباشرة فى العبوة وده بينقل الباكتيريا من الجلد، أو استخدام الأصابع بعد ملامسة الحبوب على الوجه مثلا، كمان كتير فى بنات بتخزن المكياج فى الحمام، وده طبعا ليس المكان المثالى لأنها بتكون أكثر عرضة للتلوث فى الحمام.

وأخيرا آخر نصيحة هوجهها لك هي إن لو المكياج تغير لونه أو رائحته أو كثافته وملمسه تخلصي منه تماما، ولو متغيرش فيه حاجة لكن تسبب فى أي نوع من أنواع الالتهاب أو الحبوب برضه تخلصي منه فورا.