أهم المعلومات عن بوخارست - رومانيا

رومانيا - بوخارست

رومانيا بالنسبة ليا واحدة من الدول الى مش واخدة حقها فى شرق أوروبا، ويمكن يكون بالنسبة للمصريين السفر لرومانيا مش سهل لصعوبة إجراءات الفيزا وعدم وجود طيران مباشر، لكن حلاوة البلد نفسها وقد إيه هي رخيصة ده ممكن يعوض صعوبة الوصول ليها. وفى الآخر هي مش مستحيلة. رومانيا بلد واسعة جدا، عاصمتها كبيرة وأطرافها كتير هي بوخارست. وكما هو متوقع من بلد فى شرق أوروبا فالطبيعة فى رومانيا خصوصا برة العاصمة جميلة جدا.

بوخارست مدينة واسعة فعلا، لكن حديقة هيراسترو بتستحوذ على مساحة واسعة جدا من شمال المدينة. وعلى الرغم من إن هيراسترو أكبر واحدة، فى حدائق عامة كتير تانية في بوخارست. المدينة كبيرة فعلا لكن متوصلة كويس بالمترو وبالتاكسي ووسئل مواصلات تانية طبعا.

الفيزا والطيران

رومانيا لسه مش خاضعة لاتفاقية الشنجن، ولكن لو مصري ومعاك شنجن متعددة تسمحلك بدخول رومانيا، الفيزا لرومانيا بس بتطلع من سفارة رومانيا في القاهرة ومكانها الزمالك. مفيش طيران مباشر لرومانيا، لكن أقصر رحلة بترانزيت في تركيا، وفي رحلات أطول عن طريق معظم العواصم الأوروبية. وفي كمان قطارات من وإلى بوخارست من بودابست، أقرب عاصمة لشمال رومانيا وطبعا من مدن ودول تانية كتير حواليها.

المناطق السياحية

أكثر منطقة سياحية زحمة خصوصا فى الصيف هي المدينة القديمة، أو وسط البلد. الجزء ده من المدينة بيتميز بالعمارات والشوارع القديمة، المكان قديم لدرجة إن الشوارع مخصصة للمشاة فقط فى معظم المنطقة لأن الشوارع ضيقة ومش مصممة للعربيات. المكان في الصيف بيعيش جدا وبيكون زحمة دايما بسبب المطاعم والبارات والنوادي الليلية الكتيرة فى المنطقة.

حديقة هيراسترو ممكن تكون واحدة من أكثر الأماكن اللي ممكن تقضية وقت فيها، سواء مشى أو بإيجار عجلة في مناظر كتيرة مختلفة فى الحديقة اللى في جزء منها فيه بحيرة كبيرة، الحديقة فيها كمان فعاليات بتتعمل في الصيف وفيها مراجيح وأماكن للعب الأطفال ومطاعم.

بوخارست فيها متاحف كتيرة من أكثرها شهرة متحف القرية وهو متحف ريفي بيعرض حياة الرومانيين القدماء، وفي المتحف الوطني في وسط البلد واللي فيه تاريخ كتير عن البلد، وقريب من وسط بوخارست في كمان مبنى ضخم جدا ممكن زيارته هو البرلمان. إضافة لدول في متحف الفلاحين ومتحف التاريخ الطبيعي والاتنين موجودين في منطقة وسط البلد. رومانيا بشكل عام وبوخارست بشكل خاص بلد شابة معظم سكانها شباب وأكتريتهم من الإناث، عشان كده في كل مكان في المدينة في حاجات كتيرة تتشاف وتتعمل، سواء كانت كافيهات غريبة أو أماكن مخصصة للغناء والكاريوكي أو مطاعم بتقدم أكلات تقليدية وغريبة.

بوخارست زي ما قلت كبيرة جدا عشان كده اختيارات الإقامة مختلفة حسب المنطقة. اكتر منطقة الإقامة فيها قريبة للاماكن السياحية والمترو هي المدينة القديمة وفي حواليها فنادق كتيرة. في كمان شقق للايجار وهوستيل طبعا. 

الأكل والتسوق

بوخارست زيها زي معظم العواصم الأوروبية فيها كل مطاعم الأكل العالمية، وكمان في المدينة القديمة في مطاعم بتقدم أكل روماني تقليدي، وأكلات من المطابخ العالمية. تبقى أكثر الأكلات انتشارا في المدينة هي الشاورما والأكل الإيطالي، لسبب ما الشاورما ليها شعبية كبيرة جدا لدرجة إن في مقرمشات معمولة بطعم الشاورما!

إذا ماكنتوش تعرفوا إن بوخارست بتشتهر بالمخبوزات.. لما تروحوا هتعرفوا، لأنها واحدة من أكثر الروايح اللي باينة في المدينة، خصوصا في المترو لما الريحة بتتحبس تحت الأرض وتملا المحطة كلها. ريحة المخبوزات لو شدتكوا ناحية أي محل أو مخبز لازم تجربوا حاجة معمولة بالتوت. التوت البري موجود في بوخارست بكثافة وبيطلع لوحده، التوت ليه طعم تاني في بوخارست مقدرش أوصفه بالكلام.

بالنسبة للتسوق، رومانيا فيها مصانع للماركات الكبيرة، لأن العمالة في رومانيا رخيصة بشكل نسبي وهي كمان قريبة للأسواق الأوروبية عن الصين. عشان كده التسوق في الملابس تحديدا رخيص في رومانيا وأرخص من معظم أوروبا. في أكتر من مركز تجاري كبار في المدينة بتجمع معظم الماركات العالمية وكلها ليها مواصلات سواء مترو أو أوتوبيس. 

العملة المحلية هي اللاي أو الرون بتتقال كده او كده وفي أماكن بتقبل يورو. العملة رخيصة وده معناه أن البلد كمان رخيصة خصوصا الاكل لو من السوبر ماركت وكمان المواصلات والإقامة.

ملحوظة: بالنسبة للبنات "وللولاد اللي عايزين يجيبوا هدايا للبنات" بوخارست فيها فروع لسيفورا ومحلات مكياج كتيرة.

دراكولا

خلال فترة إقامتي في بوخارست قررت إني أطلع رحلة ليوم واحد ورحت مع أعز أصدقائي مدينة براشوف. براشوف واحدة من أكبر المدن في منطقة ترانسيلفانيا، من المناطق اللي فيها معظم تاريخ رومانيا، وهي طبعا المكان المرتبط بدراكولا وفيها القصر بتاعه، لكن فيها قصور تانية كتير. الرحلة لقلعة دراكولا ممتعة لكن مش مميزة، إنما براشوف نفسها مدينة حلوة جدا خصوصا في فصل الصيف وتستاهل الزيارة.

الجو

رومانيا فيها كل الفصول، بمعنى كل الفصول. الصيف الجو جميل والنهار طويل، على الرغم من إن في أيام مطرة إلا إن معظم الأيام شمس. الشتا تلج وجليد وزحلقة والدنيا بتقلب أبيض في ساعات. بوخارست بتختلف كتير عن الصيف في الشتا. خصوصا منطقة المدينة القديمة وهيراسترو لما التلج بينزل والشوارع اللي بتكون في الصيف مليانة سياح وعجل وكراسي البارات والقهاوي واخدة نص الشارع وفجأة في الشتا تتملي تلج بس. مش معنى كده إن رومانيا في الشتا وحشة، أبدا بالعكس، رومانيا ليها طعم تاني في الشتا وخصوصا المناطق اللي برا بوخارست والمدن التانية، اللي على الرغم إني مزرتهاش إلا إنها على قائمة أمنيات السفر بتاعتي.

تابعوني لو عايزين تسافرو معايا:

http://youtube.com/shahinazhussein

http://facebook.com/evebyshahi

http://instagram.com/evebyshahi

http://twitter.com/evebyshahi