كريم أساس لونا Luna HD Foundation

الأسبوع اللي فات نزلت البوست ده على انستجرام ووعدتكوا إني هعمل عرض كامل لكريم أساس لونا ورأيي فيه بعد ما استخدمته لمدة أسبوع، وكل أسبوع هجرب حاجة وأكتب عنها ريفيو. الأسبوع ده أول منتج من ضمن المجموعة هو كريم أساس لونا HD Foundation. أول حاجة الكريم مكتوب عليه إنه High Coverage All Day Long يعني تغطيته عالية طول اليوم. لو عايزين تعرفوا إذا كان الكلام ده حقيقي ولا أي كلام كملوا قراية.

الاستخدام:

أنا استخدمت كريم الأساس تقريباً على مدار الأسبوع 5 مرات، وفي كل مرة استخدمته بشكل مختلف، سوء بالنسبة لطريقة الفرد أو بالنسبة لكمية الكريم أو بالنسبة لاستخدامه مع المنتجات التانية. لاحظت إن أكتر طريقة كويسة لاستخدام كريم الأساس هو بالسفنجة، الفرشة مبتوزعوش بشكل كويس، وكمان أهم حاجة بالنسبة لي لأن بشرتي جافة إني كان لازم أستعمل كريم مرطب أو زيوت قبل كريم الأساس لونا لأنه كان بيمسك في الأجزاء الناشفة وبينشف الجلد أكتر من اللازم. لكن مع استخدام المرطب المشكلة دي راحت. استعملته كمان لوحدة ومع بودرة والاتنين كان تقريبا نتيجة واحدة. واستخدمته مع أماندا Blush Stick ومتحركش تحتها أو مأثرتش على ثباته. الحاجة الوحيدة اللي دايقتني عند أول استخدام هي ريحته، ريحته إلى حد كبير قوية وباينة وبتفضل موجودة بعد الاستخدام شوية.

التغطية:

بالنسبة للتغطية فهي أكيد مش عالية من أول طبقة، بس المشكلة اللي واجهتها لما حاولت أزود الطبقات إنه كريم الأساس ده مش طري كفاية، وفي النهاية كان بيخلي شكل وشي ناشف لو زودت عن طبقة واحدة، وبيبان إنه وشي عليه طبقة من الكريم السميكة. التغطية حلوة جدا بالنسبة لطبقة واحدة بتخلي الشكل طبيعي وبتدي فرصة إن لون البشرة يتحسن. أقدر أقول في النقطة دي فعلا إن تسمية HD هي الصح.

في الحر:

خلال الأسبوع اللي فات كان في يومين حر جداً وللأسف اليومين دول كشفولي إن الكريم ده مش بتاع صيف خالص، كريم الأساس لونا Luna HD Foundation ممكن يكون حلو للجو الشتوي خصوصا لو بشرتك زي حالاتي مسامها حساسة للحر أو لو وشك بيعرق، الكريم اتضح في الحر إنه تقيل جدا وعلى الرغم من إنه فضل ثابت فعلا إلا إنه كان مش مريح خالص.

بعد يوم طويل:

فكرة الثبات فعلاً حلوه في كريم الأساس ده وهو فعلاً فضل ثابت طول اليوم على الرغم من إني كنت باستعمله الساعة 10 الصبح وبفضل بيع لـ10 بليل، على مدار 12 ساعة التغيير كان قليل جداً وعلى العكس من كريمات أساس كتير مكانش بيطلع في إيدي أو في هدومي، لكن يمكن يكون السبب في ده إني كنت بحط طبقة واحدة متوزعة كويس.

الحكم النهائي:

الحكم النهائي على كريم أساس Luna HD Foundation هو إنه كريم أساس كويس للمكياج النهاري البسيط في الشتا، سعره مناسب، تغطيته مش مناسبة للبشرة الجافة إلا لو طبقة واحدة، تغطيته بتستمر ساعات طويلة.

تابعوني وكل أسبوع هعمل ريفيو لمنتج جديد من المنتجات اللي في الصورة، الأسبوع ده هيكون عرض الروج والماسكرا من ريميل.

Facebook.com/evebyshahi

Instagram.com/evebyshahi

Shahinazhussein.blogspot.com

Twitter.com/evebyshahi