ماسكارا Rimmel Glam Eyes Day 2 Night وروج Rimmel Lasting Finish Lipstick

الأسبوع ده هكمل سلسلة الريفيو اللي بعملها للمكياج اللي جبته الفترة اللي فاتت وتعالوا أحكيلكوا تجربتي مع المكياج بتاع الأسبوع اللي فات قبل ما أبدأ أسبوع جديد من الاختبارات. الأسبوع اللي فات كنت بستعمل الماسكارا والروج بتوع ريميل اللي جبتهم في عرض خاص من سمير ويليام. لو العرض ده خلص ممكن تلاقوا نفس الروج ونفس الماسكارا موجودين من غير عرض.

نبدأ بالماسكارا Rimmel Glam Eyes Day 2 Night Mascara

بعيدا عن فكرة إن أول ماسكارا وأحلى ماسكارا جبتها في حياتي كانت من ريميل، فأنها منحازة للبراند ده في الماسكارا بالذات، لكن في الحقيقة الماسكارا دي أول مرة أجربها وعجبتني جدا.

الاستخدام - الخطوة الأولى Day:

مبدأيا كده هي مرحلتين الأولى ماسكارا خفيفة جدا وظيفتها إنها تعمل تطويل لكن مش تقيلة ولا بتمسك في الرموش جامد، أنا للأسف رموشي إلى حد كبير شبه رموش الفيل كده دايما بصه لتحت وصعب جدا إنها تترفع أو تبقى Curely غير لو بماسكارا كتير جدا وتقيلة جدا، لكن الماسكارا بتاعة ريميل بتعمل مفعول كويس بالنسبة لي مقبول جدا. لونها أسود غامق لكن مش بتلمع وشكلها مش واضح قوي زي بعض الأنواع التانية اللي بيكون باين جدا إنها ماسكارا تقيلة. من أهم الحاجات اللي عجبتني إنها مبتنشفش بشكل مزعج ومش بتقشر ومعنى كده إنها بتدي شكل متناسق للرموش. ومن الحاجات المهمة جدا بالنسبة لي برضه فكرة إنها مبتعمليش حساسية زي معظم مكياج العيون وده شيء نادر جدا يحصلي مع ماسكارا. الحكم النهائي بالنسبة للماسكارا في الخطوة الأولى هي إنها فعام اسكارا كويسه للاستعمال اليومي.

الاستخدام - الخطوة الثانية Night:

الخطوة التانية في الماسكارا هي خطوة Night الفرشة أتخن والماسكارا نفسها أتقل والفكرة إنها تعمل Volume وده فعلا بيتحقق، شكل رموي كان بيفرق في كل مرة كنت بستعمل الفرشة التانية لأن زي ما قلت رموشي صعب جدا إنها تترفع من غير ماسكارا تقيلة شوية، لأن شكلها الطبيعي مفرود لتحت. مش هقول إنها أحسن ماسكارا استعملتها في حياتي لكن في الحقيقة هي واحدة من الكويسين وبالنسبة للسعر ده فهي ماسكارا كويسه للاستخدام العادى. الحكم النهائي للخطوة التانية هي إنها كويسة للاستعمال العادى إنما لو هتعملي مكياج سهرة أو حاجة محتاجة ماسكارا قوية جدا مش دي الماسكارا اللي تشتريها. بالرغم من إنها مش مضادة للمياه إلا إنها كانت بتقعد لآخر اليوم وإزالتها سهلة جدا بماء مايسلر.

الحاجة التانية اللي استعملتها طول الأسبوع هو الروج. وهو Rimmel Lasting Finish Lipstick:

اللون والاستخدام: دي م أول مرة أستعمل روج ريميل من المجموعة دي لكن أول مرة أختار لون نود أو Nude طبيعي، اللون اللي اخترته هو 070 Airy Fairy. الحقيقة إن بقالي فترة طويلة جدا لما بحب أستعمل روج بلون طبيعي بختار حاجة ماط مش بيلمع أو مش كريمي. الاستخدام بتاع الألوان دي أسهل من الأحمر والغوامق لأنه مبيتاجش دقة وكمان مش لازم معاه قلم تحديد، كمان الألوان الطبيعية بتليق مع معظم المكياج واللبس ومناسبة جدا لو في خروج كل يوم في النهار لشغل أو غيره. اللون ده تحديدا أفتح شوية من شكله في الأنبوبة وكمان كريمي مش ماط يعني بيلمع شوية في الإضاءة القوية.

التغطية والثبات: بالنسبة للتغطية فتغطية الروج ده متوسطة، لونه مش بيغطي تماما على لون الشفايف، ودي حاجة ظريفة لكن وحشة في الوقت نفسه، لأن الروج بندمج مع لون الشفايف وبيكون أليق مع البشرة وبيكون شكله طبيعي أكتر لكن في الوقت نفسه مش بيدي التغطية الكاملة زي أنواع تانية من الروج. بالنسبة للثبات فثبات النوع ده من الروج عادي، بيتمسح طبعا مع الأكل والشرب وفي معظم الأيام لقيت نفسي محتاجة أخده معايا وأعيد استخدامه مرة أو اتنين خلال اليوم. لكن ده بيحصل مع معظم أنواع الروج برضه.

الراحة: من ناحية الراحة فالروج مريح لكنه مش أريح روج استعملته في حياتي طبعا. أنا شخصيا مبحبش الروج اللي ليه ريحة نفاذة أو طعم مميز أو اللي بيلزق أو بينشف الشفايف. الحاجة الوحيدة اللي دايقتني في روج Rimmel هي الريحة الجامدة، هي ريحة حلوة، لكن أنا ساعات كتير مبستحملهاش، غير كده هو بالنسبة لي مريح وخصوصا لو شاربة مياه كفاية ولو استخدمت زبدة كاكاو قبل استعماله عشان ترطب الشفايف.

الحكم النهائي:

بالنسبة للعرض كله أنا مستمتعة جدا باستخدام المنتجين دول من Rimmel سواء مع بعض أو كل حاجة لوحدها. أكتر حاجة عاجباني هي الماسكارا وفكرة إنها مبتعمليش حساسية وهي كمان واحدة من أريح أنواع الماسكارا اللي استعملتها في حياتي. راضية جدا عنهم ولسه ريميل واحدة من ماركات المكياج المفضلة بالنسبة لي.

الأسبوع اللي جاي هعمل ريفيو لحاجات كنت مستنية بفارغ الصبر إني أستعملها: كريم أساس وكونسيلر ميبيلين وأي شادو فلورمار. استنوني في نفس المكان الأسبوع اللي جاي.