ريفيو: فلورمار هايلايتر وماسكارا وروج لونا السائل

الأسبوع ده الريفيو لازم يكون حلو، لأنه واحد من المنتجات اللي هتكلم عنها هي هايلايتر! فكرة وجود هايلايتر أصلا في السوق في مصر لوحدها فكرة مبهرة ولما يكون كريم ولما يكون حلو يبقى إحنا كده وصلنا ليفيل الوحش في الهايلايتر. الهايلايتر اللي بتكلم عليه من فلورمار، والريفيو اللي هعمله النخاردة هيتضمن الهايلايتر Double Radiance Primer, Highlighter وماسكارا فلورمار برضه اسمها Super Lash وأخيرا لونا Plumping Liquid Lipstick رقم 880.

Flormar Double Radiance Primer Highlighter

أنا عارفه إنه مكتوب عليه برايمر، لكن في الحقيقة هو هايلايتر، طبعا زي ما قلت سوق الهايلايتر في مصر حاجة مشينة، تقريبا مفيش غير نوعين تلاتة وفكرة إنه يكون كريم فكرة عالمية، وبما إني معنديش حاجة أقارنه بيها فهو بالنسبة لي أحسن هايلايتر استخدمته. ممكن تستخدميه تحت كريم الأساس وممكن فوقيه، أنا شخصيا بستعمله فوقيه وهو كريم خفيف فمعنى كده إن التحكم فيه سهل، ممكن يبقى بسيط وخفيف وممكن تتقليه لو خارجة بليل أو لمكياج سهرة مثلا. من ناحية الاستخدام أنا استخدمته بسفنجة وبفرشة وبصوابعي، وأكتر حاجة نفعت معاه هي الفرشة، الثبات بتاعه مش عالي لكن مقبول جدا. مفيش مجموعة ألوان كبيرة من الهايلايتر ده هو لون أو درجة واحدة وهي ناحية البرونز أكتر من الأبيض.

Flormar Super Lash Mascara

تاني أسبوع من السلسلة دي كتبت عن مارسكارا ريميل، وقلت وقتها إنها أكتر ماسكارا مناسبة ليا وإنها الماسكارا الوحيدة اللي مبتحرقش عنيا. ماسكارا فلورمار فيها العيب ده، بتحرقلي عنيا شوية، لكن أنا مش عارفة إذا ده كان عيب فيا ولا فيها لأن ده دايما بيحصلي حرفيا. أنا كمان عندي مشكلة تانية هي إن رموشي خفيفة ودايما باصة لتحت زي رموش الفيل كده :D عشان كده صعب جدا الماسكارا تعمل معاها مفعول زي مابتعمل مع بنات تانية. الماسكارا بتاعة فلورمار خفيفة وهي أكيد يومية مش هتكون مفيدة قوي لو بتعملي مكياج تقيل أو مكياج سهرة. بالنسبة للثبات فهي ثابتة مبتسيحش لكن في الوقت نفسه بتتشال بسهولة باستخدام ماء مايسلر أو زيت جوز هند. الحكم النهائي إنها ماسكارا عادية جدا وفي أحلى منها متاح في السوق.

Luna Plumping Liquid Lipstick

الحاجة اللي شدتني للروج ده هو مجموعة الألوان، مجموعة الألوان كلها حلوة جدا. أنا عادة بنجذب للون طبيعي كده أو لون كشمير لكن قررت أجرب حاجة تانية واخترت لون 880 وهو لون إلى حد كبير وردي غامق، لكن شكله مش غريب على الشفايف، طبعا عشان هو Plumping فمعناه إنه بيعمل إحساس منعش كده وبيلسع شوية، اللون مش ماط خالص وهو روج تقيل على الرغم من كده مكانش مزعج قوي بالنسبة لي، وأحلى حاجة إن ريحته ماضيقتنيش خالص. من ناحية الاستخدام فالروج بفرشه وكليكر في النهاية بيضغط عليه زي القلم فيطلع الروج على الفرشة. مش أسهل حاجة لكن بيسمح يتحديد كمية اللون ودرجته حسب كمية المنتج اللي على الفرشة. الفرشة رفيعة كفاية إن مكان الاستخدام يكون محدد لكن مش رفيعة بحيث تكون مملة في الاستخدام. الحكم النهائي كويس جدا وعايزة أجيب منه درجات تانية.

تابعوني:

Facebook.com/evebyshahi

Twitter.com/evebyshahi

Instagram.com/evebyshahi

Pinterest.com/evebyshahi