ريفيو عن كريم أساس وكونسيلر مايبلين Fit Me وباليت اي شادو فلورمار

ممكن يكون الريفيو ده من أكتر الحاجات القريبة لقلبي، لأن المنتجات اللي جربتها كانت من أحسن الحاجات اللي جربتها السنة دي. الأسبوع ده جربت مكياج من مايبيلين ولحد دلوقتي مكنتش جربت من الماركة دي غير الروج والكحل، لكن أول مرة جرب كريم أساس وكونسيلر أو مصحح الاتنين من مجموعة Fit Me ومعاهم كمان جربت باليت آي شادو فلورمار، والحقيقة دي مش أول مرة أجرب الأى شادو بتاعهم بس الألوان دي جديدة عليا كلها عشان كده قررت أجربها.

كريم الأساس Maybelline Fit Me! Matte + Poreless Foundation

الاستخدام والتغطية:

على الرغم من إن الأنبوبة مكتوب عليها ان كريم الأساس ده مكتوب عليه إنه للبشرة الدهنية للعادية وأنا بشرتي جافة إلا إنى محستش أبدا إنه نشفلي بشرتي. التغطية بتاعته كويسه جدا، تغطيته مش كاملة وبالعكس الكريم ده خفيف جدا وبيتفرد ويتوزع بسهولة جدا على البشرة، من أحسن الحاجات اللي فيه إنه مش بيبقى أغمق مع الوقت زي كريمات أساس تانية جربتها قبل كده. معنديش مشكلة مع كريم الأساس ده غير إنه للأسف أنا اشتريته من كارفور وده معناه إن مكانش فيه اختبار للون، ومعنى كده إني جبته غامق جدا درجة 120 وإلى حد كبير على بشرتي طلع لونه برتقالي. لكن اللي عرفته إن فيه أماكن بتبيع مايبلين فيها اختبار للون. بالنسبة للاستخدام فعلى مدار الأسبوع أنا استخدمته كل الأيام اللي خرجت فيها تقريبا، توزيعه سهل جدا سواء باستخدام Beauty Blender أو لأنه مش كثيف وإلى حد كبير سائل في كذا مره وزعته بصوابعي وبرضه كان كويس جدا على الرغم من إني استخدمت كمية قليلة.

مع المنتجات التانية:

جربت كريم الأساس ده مع منتجات تانية أولا استعملته من غير برايمر خالص لكن في مرة استخدمت معاه كريم تفتيح جارنييه عشان يديله ضوء ولمعة حلوة وفعلا عمل مفعول كويس جدا. المرة التانية استخدمته لوحده ومرة كمان استخدمته واستخدمت معاه بودره من Catrice Cosmetics وفي كل مرة كنت راضية جدا بالنتيجة.

الحكم النهائي: واحد من أحسن كريمات الأساس اللي استعملتها في حياتي.

كونسيلر Maybelline Fit Me Concealer

الاستخدام والتغطية:

أنا مبهورة جدا بالكونسيلر ده، من ساعة ما خلصت Wake Me Up بتاع ريميل وأنا بدور على بديل كويس ليه يكون متاح في مصر، وانبهرت بمعنى الكلمة لما جربت Maybelline Fit Me أولا الكريم خفيف جدا وده معناه إن استخدامه متعدد. ممكن يستعمل كHighlighter وممكن كمان لتغطية العيوب والهالات السوداء لأنه Buildable يعني ممكن يتحط منه كذا طبقة ويتقل من غير ما يكون شكله مقشر أو واضح. بالنسبة للتوزيع فجربته بالفرشة وبصوابعي وبسفنجة Beauty Blender وفي كل الحالات كان كويس بس أحسنهم السفنجة لأنه ناعم جدا وبيتحرك بسهولة وبالتالي توزيعه بالفرشة مش سهل، خصوصا في حالة الهالات السوداء الجميلة قوي اللي تحت عنيا دي واللي صعب جدا تختفي غير بأنواع معينة جدا من المكياج.

الحكم النهائي: أخيرا لقيت بديل لريميل Wake Me Up

باليت أي شادو فلورمار:

الألوان:

إيه الجمال ده؟ أنا عارفة إن كتير قوي ناس بتقوللي إن الألوان دي مبتلقش عليا، بس أنا فعلا بحبها ومغرمة بيها جدا، أنا كنت اشتريت قبل كده باليت تانية كلها ماط من نفس المجموعة لكن الألوان الدافية دي مكنش في منها غير اللامع، ومع ذلك فأنا حبيتها جدا وبسرعة جدا بقت واحدة من أكتر الألوان المفضلة بالنسبة لي. الباليت فيها الغامق والفاتح لكن مفيهاش لون كونتور أو اللي بيتحط في الـCrease لكن فيها الأبيض لتفتيح تحت الحواجب وكمان ممكن يتسخدم في الركن الداخلي كده ويدي ضوء حلو.

الاستخدام:

استخدمت الأي شادو ده بطريقتين مرة تحتيه أي شادو كريمي لونه بيج وده خلى الألوان أقوى بكتير وكانت ثابتة فضلت بيها طول اليوم، والمرة التانية استخدمتها لوحدها وعملت لوك نهاري مكنتش محتاجة الألوان تكون تقيلة فيه، في الحالتين الباليت ممكن يطلع منها كذا شكل وممكن والأولان ناعمة جدا في التوزيع وممكن تتقل كمان، بشكل عام معجبة جدا بالباليت دي واستخدامها وألوانها.

الحكم النهائي:

ممكن متكنش أحسن حاجة جربتها في حياتي بس هفضل استعملها فترة طويلة.