أحسن خمس قطع مكياج اشترتها في حياتي

وأنا صغيرة مكنتش بحب المكياج ولا بفهم فيه، مبدأتش أحب المكياج غير في نص العشرينات مثلاً، ومن وقتها حياتي اتغيرت تماماً. على مدار السنين اللي فاتت اشتريت وجربت مكياج كتير بأنواع كتير، وزي معظم البنات بقضي وقت فراغي بتفرج على فيديوهات وتوتوريال المكياج على يوتيوب وانستجرام. وبكون سعيدة جداً لما أشتري مكياج جديد، وعشان كده دايماً لازم أتخلص من أي مكياج قديم أو أي مكياج مبستعملوش لأن في النهاية مش هقدر أستعمل كميات كبيرة مهما استعملت كل يوم، لكن بلف ألف وأرجع لحاجات معينة وبعتبر الحاجات دي هي أحسن مكياج اشتريته في حياتي:

باليت آي شادو سليك  Sleek Eye Shadow iDivine Palette

اشتريتهم من رومانيا في رحلة لبوخارست، وبستعملهم تقريبا كل يوم. للأسف ماركة سليك مش موجودة في مصر بس ممكن تشتروها أونلاين أو من على الفيسبوك. الباليت بتاعت آي شادو دي مش بس فيها تنوع كبير في الألوان وبالتالي في اللوك اللي أقدر أعمله بيها، هي كمان ألوانها ثابتة وثقيلة جداّ. في أوقات لما بحب كمان أضيفلها قوة أكبر بستعمل معاها آي شادو كريمي أو مصحح تحت الآي شادو وبيخليها تثبت أكتر ويبقى لونها أقوى بكتير. في الحقيقة كل الحاجات اللي اشترتها من سليك حلوه جدا سواء الآي شادو أو الكونتور أو الBlush.

روج ريميل Rimmel Kate Moss Lipstick

أول مرة اشتريت الروج ده كنت في لبنان، وقتها كان لسه نازل واشتريت لون روز فاتح ولون أحمر، ومن وقتها جمعت ألوان كتير منه ويعتبر الروج المفضل بالنسبة لي. أولاً لأن مجموعة الألوان فعلاً فيها كل اللي أنا محتاجاه، وثانياً لأنه كريمي ومريح جداً. وأخيراً لأن ألوانه كلها فعلاً بتظهر على الشفايف من غير ما تنشفها. الروج ده مش ثابت لكن بالنسبة لي دي مش مشكلة لأن كده كده الروج دايماً في شنطتي ودايماً بعيد عليه بعد أي شرب أو أكل.

آي شادو تاتو كريمي من مايبيلين Maybelline New York 24 hours Tatto Eye-shadow

من أوائل الشركات اللي عملت آي شادو كريمي كانوا مايبلين، ومن وقتها شركات كتيرة كررت التجربة. بستعملهم لوحدهم أو كأساس تحت الآي شادو، وفي الحالتين ألوانهم ثابتة وقوية وبيساعدو أي شادو يتحط فوقيهم إنه يظهر بشكل أقوى. المشكلة الوحيدة إنه بينشف مع الوقت، لكن برضه أنا معنديش مانع اشتريه تاني. زي ما قلت في ماركات تانية كتير بتعمل نفس النوع من الآي شادو، زي ميك أب فوريفر وريفلون وشانيل وشارلوت تيلبوري وتوم فورد.

أماندا أرت لاينر Amanda Art Liner 

القلم ده خلص ورجعت اشتريته ثلاث مرات، هو أكثر قلم كحل سائل سهل الاستخدام وماط ولونه غامق استعملته، كان في زيه في H&M  وكان بيثبت أكتر لكن قلم أماندا أفضل كثير لأنه مش بيعمل حساسية. القلم ببساطة هو الكحل السائل الأسود اللي هتحتاجيه لأي شكل وأي لون مكياج.

رموش أرديل Ardell Demi Wispies

للأسف الرموش دي مش لاقياها تاني في مصر، لكن لما كانت موجودة اشتريت منها كذا واحدة، بشكل عام الرموش شكل Demi Wispies هي المفضلة بالنسبة لي خصوصاً فى مكياج السهرة. النوع اللي اشتريته من أرديل هو Color Impact بلون Wine الرموش لونها مش أسود سادة لكم في ألوان بني وكستنائي فيها والهدف منها إنها تظهر العيون الملونة أو العدسات. الألوان اللي بتحسنها هي الأزرق والعسلي والأخضر. 

طبعاً مش دي بس هي الحاجات اللي بحبها أكيد في أكتر، لكن دي هي أكتر حاجات برجعلها تاني وبرجع أشتريها لو خلصت وبعتبرها أحسن قطع مكياج اشترتها في حياتي.