٥ نصائح للأمهات خلف عجلة القيادة

تعديل مقعد الطفل

 من البديهي إن وجود طفل في العربية يتطلب وجود مقعد للطفل، وجود الطفل داخل السيارة بدون مقعد خطر كبير وخصوصاً على الطرق السريعة. للأسف أمهات كتير جدا بتختار مقعد الطفل من السنة الأولى وبتركبه مواجه للأمام، وهو أكيد أمان لكن الأكثر أمانا هو تركيب المقعد مخالف لاتجاه السير (بمعنى إن الطفل يكون وشه لورا مش لقدام). الفيديو ده بيوضح الفرق. قانون المرور الجديد مش بينص على اتجاه معين لتركيب مقعد الطفل غير إنه بيعاقب السائق على التالي: ”السماح بركوب الأطفال دون السابعة في المقاعد الأمامية أو الأطفال دون الثانية بدون كرسى تقييد خاص ومثبت بالمقعد الخلفى أو ظهر المقعد الأمامى“. في كراسي أطفال كمان معدة لأنها تتركب في المقعد الأمامي بجانب السائق، خلي بالك لو هتركبي كرسي الطفل قدام لازم تقفلي الوسادة الهوائية الأمامية لأنها في حالة وجود كرسي للطفل هتشكل خطورة على حياته.

في كلام ودراسات كتيرة جداً في اتجاه تركيب مقعد الطفل، أنا شخصياً برجح اتباع تعليمات المرور الأمريكي المستند لبعض من الدراسات دي، واللي بتقول إن الأطفال أقل من عمر سنة ليهم كرسي مخصوص وبيكون مواجه للخلف، والأطفال من سنة إلى ٣ سنين ليهم كرسي تاني ومواجه للخلف. من ٤ إلى ٧ سنوات مقعد الطفل بيكون مواجه للأمام وبيكون مزود بحزام بيلف حوالين الكنبة من فوق ويثبت الكرسي بشكل أفضل. وأخيراً من ٨ إلى ١٢ سنة كرسي جديد بارتفاع مناسب للأطفال.

وكقاعدة عامة السن هنا هو مجرد مرجعية إنما الحكم في اختيار المقعد المناسب للطفل يعتمد على طوله ووزنه وقياساته وليس عمره، وكل نوع كرسي بيكون مكتوب عليه القياسات المناسبة، لما طفلك قياساته تتغير لازم يتم تغيير الكرسي، لأن الكرسي الغلط بيشكل خطورة على الطفل أكتر من حمايته. مهم جداً جداً تركيب المقعد بالشكل الصحيح وفي الاتجاه الصحيح، لو المقعد مصمم عشان يكون مواجه للأمام تركيبه للخلف خطر، والعكس صحيح وطبعاً في مقاعد مصممة ليتم تركيبها في الاتجاهين المهم اتباع تعليمات المصنع بدقة عند التركيب.

متسيبيش الطفل في العربية لوحدة

شيء بديهي جداً إننا منسبش الطفل لوحده في العربية، مش بس عشان خطر الاختطاف لا قدر الله لكن في ناس بتفتكر إن لو العربية مقفولة كويس مفيش مشاكل من ترك الطفل في السيارة. الخطر الآخر في ترك الأطفال في سيارة مقفولة هو الحرارة، وده بينطبق على الأطفال والكبار والحيوانات كمان. حتى في وجود فتحة في الشباك الحرارة بترتفع بشكل كبير جداً داخل السيارة وخصوصاً في بلد حر في الصيف زي بلدنا، ترك الطفل في السيارة بيعرضه لخطر الحرارة المرتفعة والاختناق في خلال دقائق قليلة، خصوصاً لأن قدرة احتمال الأطفال أقل كتير من الكبار. 

استخدام الموبايل

طبعاً مش محتاجة كلام. استخدام الموبايل أو أي حاجة بتتسبب في التشتيت زي الراديو أو الأكل أو الشرب في العربية أصلاً خطر لأي حد، إنما وجود ركاب آخرين في السيارة كمان خطورة أكبر خصوصاً لطفل صغير. للأسف أمهات كتير جداً جداً بتفتكر إن استخدام الموبايل عادي أثناء القيادة. مكالمة التليفون الخطر منها مش بس استخدام الأيدي والتشتت بالنظر لشاشة التليفون لكن الخطر منها التشتت بسبب المكالمة نفسها، وده ممكن يتسبب في كوارث على الطريق. في أمهات للأسف مش بس بتتكلم في التليفون وهي سايقة لكن كمان بتستخدمه للتواصل الاجتماعي والشات وهي سايقة وبيعرضوا حياتهم وحياة أطفالهم وكل اللي حواليهم للخطر على الطريق. عشان تنتبهي ١٠٠٪ للطريق اقفلي الموبايل أو اعمليه على الوضع الصامت في الشنطة وفي المقعد الخلفي بعيد عن إيديكي. ومتشتتيش نفسك عن الطريق بتليفون أو أكل أو أجهزة السيارة نفسها الترفيهية والمعلوماتية أو حتى تواجد شخص آخر معاكي في السيارة.

متسوقيش وانتي تعبانة

معظم الأمهات (إن مكانش كلهم) تعبانين معظم الوقت بطبيعة الحال. وفي السنين الأولى للطفل النوم كده كده بيكون قليل وملخبط. متسوقيش أبداً وانتي تعبانة أو عايزة تنامي، والنصيحة دي في ظل وجود أو عدم وجود الطفل. للأسف في أمهات مبتقدرش تقدَّر تعبها، وبتكون عارفة إنها تعبانة بس مش متخيلة إنها ممكن تفقد قدرتها على السواقة بسبب التعب، والموضوع بينتهي بإن النوم بيغلبها وهي سايقة وتحصل كارثة. 

متبصيش على الطفل

النصيحة دي متعلقة بالنصيحة الأولى. مهما كان وضع كرسي الطفل سواء مواجه للأمام أو الخلف فتركيب الكرسي في الوضع الصحيح هيمنع أي شيء من إنه يحصل لطفلك في المقعد الخلفي، أمهات كتير بتعتمد على المراية في إنها تتابع الطفل وهي سايقة. أنا شخصياً اتعرضت لحادثة بسبب أم مشغولة بالنظر لبنتها في المراية، وأعرف أكتر من شخص اتعرض لحوادث مشابهة. 

تعملي إيه عشان متحتاجيش تبصي للطفل كل شوية؟ أولاً تشيلي أي حاجة ملهاش لازمة في الكنبة الخلفية، وخصوصاً لو طفلك في السن اللي يقدر فيه إنه يطول الحاجات ويقدر ياخدها ويلعب بيها. ثانياً لو طفلك احتاج انتباهك في أي لحظة، زي مثلاُ إنه بدأ يعيط أو احتاج إنك تتكلمي معاه أو إنك تلاعبيه لازم تدوري على مكان آمن تقفي فيه وتتعاملي مع الموقف قبل ما تتابعي السواقة تاني.

لو عايزة تحافظي على حياة طفلك، خلي انتباهك على الطريق ١٠٠٪.

الأطفال وظيفة دائمة وهتحتاج منك مجهود أكبر وتركيز أكتر خصوصاً ورا عجلة القيادة.