بلاد غير تقليدية للسفر في النصف الثاني من ٢٠١٨
تنزانيا
وقت الزيارة: أفضل وقت لزيارة تنزانيا بين مايو وأغسطس، على الرغم من إن الوقت ده هو وقت الصيف في مصر، في تانزانيا هي أكتر فترة الجو فيها كويس، درجات الحرارة في تنزانيا بتنزل في الفترة دي تحت درحة ٢٠ مئوية وفي باقي السنة بتكون ما بين ٢٥ و٣١ درجة. في أماكن بيكون فيها أمطار ما بين مارس ومايو ومناطق فيها أمطار بين أكتوبر وابريل.
تروح ليه؟
الطبيعة، والحياة البرية اللي مفيش زيها، يمكن يكون في زيها في أماكن تانية في أفريقيا لكن تانزانيا واحدة من أكتر الدول اللي فيها تنوع في الحياة البرية. تقريبا ٣٥٪ من مساحة تنزانيا محميات طبيعية، وفيها أكتر من ١٦ حديقة وطنية. غير الطبيعة في كمان جبل كليمنجارو في أكتر من طريقة للاستمتاع بالجبل، سواء من واحدة من الحدائق اللي بتشوف الجبل من تحت، أو عن طريق التسلق أو المشي والسفاري والتخييم في أماكن مخصصة على الجبل. من الحدائق المشهورة في تانزانيا في منطقة سيرينجيتي ودي فيها الطبيعة البرية. تانزانيا عاصمتها دودوما على الرغم من إن معظم الناس بتفتكر إن العاصمة هي دار السلام وهي واحدة من أشهر المدن فيها وكانت بالفعل العاصمة قبل كده، دار السلام على الساحل الشرقي بما إن تانزانيا في شرق أفريقيا. من الأماكن المميزة جداً في تنزانيا هي زنزبار وهي جزيرة على الساحل المقابل لدار السلام ومن أشهر السواحل في إفريقيا بسبب طبيعيتها الجذابة.
إزاي تروح من مصر؟
من القاهرة في رحلات لدار السلام، مباشرة على مصر للطيران، وقت الطيران ٥ ساعات ونص، وفي طيران غير مباشر على الطيران الإيثيوبي وطيران الإمارات وشركات تانية كمان. من دار السلام ممكن تنتقل إلى جزيرة زنزبار على طيارة لأن فيها مطار، وفي تنزانيا نفسها الانتقال بالعربيات مؤخراً كمان اتعملت شبكة انتقال سريع بالحافلات. بالفيزا للمصريين في المطار وبالنسبة لحجز الإقامة والطيران أرجح التعامل مع شركة سياحة لأنهم هيكون عندهم خبرة يعتمد عليها أكتر من الانترنت.
التكلفة التقديرية بدون المصروفات اليومية
الفيزا ٥٠ دولار
الطيران من مصر بين ٥٠٠ و٨٠٠ دولار
الإقامة ١٠ أيام في فندق ٣ نجوم في زنزبار من ٣ إلى ٨ آلاف جنيه
مالطا - فاليتا
وقت الزيارة:
مالطا جوها شبه جو مصر جدا ودرجة الحرارة بترتفع في شهور الصيف لكن عادة لن تتعدى ٣٣ درجة بما إنها في الأساس جزيرة فجوها ساحلي. وفي الشتاء درجة الحرارة بتنخفض.
تروح ليه؟
الجزيرة لها طابع خاص جدا بسبب موقعها. مالطا بين إيطاليا وتونس وليبيا وسموها بلد البحر والشمس. مالطا مش كلها جزيرة واحدة، وجمهورية مالطا كلها على بعضها لا تتعدى ٣٥٠ كم مربع، وفيها تعداد مش أكتر من ٥٠٠ ألف نسمة. فاليتا هي العاصمة. طبعا أول سبب لزيارة مالطا أكيد هيكون البحر، لكن مش البحر كده بس البحر كده وبس، البحر في مالطا بيلتقي مع الحضارة والتاريخ والحاضر كمان، في أماكن كتير فيها معابد وكنائس على الساحل، وفاليتا العاصمة هي المينا وبالتالي نقطة التقاء مالطا بالعالم وبالثقافات التانية. الزيارة مش لازم تحصر في فاليتا أكيد ممكن زيارة مالطا كلها تقريبا في أسبوع بسبب مساحتها الصغيرة. ودي في حد ذاتها ميزة. اللغة الرسمية هي اللغة المالطية اللي على الرغم من إنها بتتكتب بحروف لاتيني إلا إنها لغة مشتقة من العربية، هتندهش من كتر التأثير العربي على مالطا وده لأن العرب عاشوا ٢٠٠ سنة في مالطا وده باين جدا في اللغة اللي فيها كلمات كتيرة جدا من العربي.
إزاي تروح من مصر؟
من مصر الطيران لمطار لوكا غير مباشر على مصر للطيران وإير مالطا، أو على الطيران التركي، لوكا في الجنوب عن فاليتا لكن في مواصلات بينهم. في وقت من الأوقات كان في رحلات بحرية من اسكندرية إلى مالطا لكن في الوقت الحالي الرحلات البحرية من صقلية وإيطاليا هي الشائعة أكتر.
التكلفة التقديرية بدون المصروفات اليومية
الفيزا شينجين ٦٠ يورو
الطيران بين ٨ و١٣ حسب موعد الرحلة وتوقيت الحجز
الإقامة ١٠ أيام في فندق ٣ أو ٤ نجوم ممكن توصل ٣٠ ألف جنيه في الصيف. الأفضل حجز شقة أو هوستيل
أسبانيا - بلباو
وقت الزيارة:
أحسن وقت لزيارة بلباو قبل شهر ٧ وبعد شهر ٩ لأن دي أكتر شهور حر، شهر ٦ أكتر شهر مناسب لكن هو أكتر وقت زحمة في بلباو لأن الطبيعة فيها بتزدهر جدا في الوقت ده من السنة.
تروح ليه؟
يمكن تكون مدريد وبرشلونه أشهر مدن في إسبانيا وخصوصا للسياح لكن بلباو هي اللي أخدت لقب المدينة الأوروبية لعام ٢٠١٨. بلباو كانت مدينة صناعية من الدرجة الأولى، لكن الأوضاع الاقتصادية السيئة أدت إلى إن الاستثمار في بلباو يتنقل للسياحة وخصوصا المتاحف، المتاحف والمعارض موجودة على مدار السنة وملونة بألوان العالم كله مش إسبانيا بس. بلباو كمان بتشتهر بالأكل وهي مشهورة بإنها فيها عدد كبير جدا من المطاعم الحاصلة على نجمة ميشلان. زي كل إسبانيا العمارة والإبداع المعماري سواء القديم أو الحديث واحد من أهم مميزات بلباو والتمشية في الشارع والفرجة على العمارات في حد ذاته متعة.
إزاي تروح من مصر؟
التكلفة التقديرية
الفيزا شينجين ٦٠ يورو
بلباو على بعد ٥ ساعات بالقطار من مدريد، وعلى بعد ساعة بالطيران، وأكتر من ساعة بحاجة بسيطة من برشلونه. من القاهرة لبرشلونه أو مدريد تكلفة الطيران بين ٦ و٩ آلاف جنيه والانتقال إلى بلباو بيتفاوت بشكل كبير جدا، أرخص حاجة الأوتوبيس يبدأ من ٣٠ يورو ثم القطار يبدأ من ٦٠ يورو ثم إيجار عربية (وده كويس جدا للمجموعات) وده حسب نوع وحجم العربية وأخيرا الطيران يبدأ من ١٠٠ يورو.
الإقامة ١٠ أيام في فندق ٣ نجوم تبدأ من ١٥ ألف جنيه والهوستيل وإيجار الشقق أرخص حل بالنسبة للمجموعات.
روسيا - في الشتا!
وقت الزيارة و تروح ليه؟
الصيف أكيد! وقت كاس العالم أكيد! لأ ولا دي ولا دي. روسيا -وأي بلد تانية- وقت كاس العالم حمادة، وفي أي وقت تاني في السنة حمادة تاني خالص. لو فاتك حضور كاس العالم في روسيا متزعلش، ادخل على انستجرام واتفرج على الناس هناك وكأنك رحت بالظبط. إنما ميفوتكش زيارة روسيا في وقت تاني. وهبهرك وأقوللك إن زيارة روسيا مش لازم خالص تكون في الصيف، روسيا بتتراح في الشتا عادي جدا. أنا مش هتكلم كتير عن الموضوع ده، هسيب البوست ده بكل تفاصيله وصوره هو اللي يقنعكوا بروسيا في الشتا.
إزاي تروح من مصر؟
الطيران من القاهرة لروسيا مباشر بيروح موسكو وسانت بيطرسبورج لكن طبعا الطيران غير المباشر أرخص.
التكلفة التقديرية
بشكل عام التذاكر في الشتا أرخص وتبدأ من ٦٥٠٠ جنيه.
الفيزا عن طريق السفارة الروسية بتكلفة ٦٥ دولار.
الإقامة تختلف بشكل دراماتيكي جدا حسب الموقع لأن روسيا كبيرة جدا جدا جدا، لكن في النهاية حتى أشهر الأماكن في الشتا بتكون أرخص وممكن الإقامة في موسكو لمدة ١٠ أيام بما يعادل ٣ آلاف جنيه.
آيسلاندا
وقت الزيارة:
زي ما إسمها بيقول أرض الثلوج أكيد وقت الزيارة الأفضل ليها في الصيف، وخصوصا شهر ٦ و٧ و٨.
تروح ليه؟
عشان آيسلاندا كل حته فيها مختلفة وكلها مناظر هتاخدك لعالم تاني حرفيا. الطبيعة في كل حته في آيسلاندا ممكن تروح اللاجون وتستمتع بالسباحة في مياه معروفة بفوايدها الطبية، لو مبتحبش لاجون عندك شلالات في جولفوس. مبتحبش الشلالات في حدائق وجناين فيها أنواع من النباتات موجودة في آيسلاندا بس. لو كل ده زائد الرحلات الشتوية في الثلوج أو زيارة الشاطئ الأسود مش من اهتماماتك. مفيش مشكلة العاصمة ريكيافيك عاصمة مميزة جدا، بتتميز بالمعمار الآيسلاندي التقليدي، آيسلندا كمان مميزة بأقمشتها وطرق النسيج. الصبح الاستكشاف وبليل الخروج في ريكيافيك اللي بتكون صاحية طول الليل وخصوصا في الصيف.
إزاي تروح من مصر؟
يا إما تعوم يا إما تركب طيارة، أو ممكن تاخدها مشي، موقع خرائظ جوجل بيقولك هتاخد ١,٢١٨ ساعة بس هتركب المعدية.
الكلام الجد بقا أكيد هتروح بالطيارة، مفيش طيران مباشر هتركب وتغير في ألمانيا أو الدنمارك.
التكلفة التقديرية
الفيزا ٦٠ يورو
الطيران ما بين ٨ و٢٠ ألف جنيه ومفيش طيران مباشر.
الإقامة ١٠ أيام في فندق ٣ نجوم تبدأ من ٢٠ ألف جنيه والرقم ده ينزل لـ٦ آلاف جنيه لو نزلت في هوستيل.
Comments